کودەتاکەی تورکیاو خۆشخەیاڵیی ناسیۆنالیستەکانی کورد
فوئاد قەرەداغی
١٦ تەمموز ٢٠١٦
لەدوێنێ شەوەو ، لەگەڵ یەکەم هەواڵی کودەتای سەربازیی لەتورکیا ، سۆراخی کەناڵە کوردییەکان و تۆڕی کۆمەڵایەتی فەیسبوک دەکەم ، ئەوەی سەرنجڕادەکێشێت ، هەڵوێست و کاردانەوەکانی رۆشنبیرانی ناسیۆنالیستی کوردە . زۆربەیان گەشبینییەکی ساویلکانەو خۆشباوەڕییەکی منداڵانەیان نمایش دەکرد ، پێیانوابوو بەڕۆیشتنی ئۆردوگان و هاتنەسەرکاری چەند ئەفسەرێک دەرگای سەرفرازی و ئازادیی کورد لەباکووری کوردستان ئاوەڵا دەبێت ، تەنانەت چەند کورتە نووسین و کۆمێنتێکیش مژدەی ئازادکردنی ئۆجەلان و دەستبەسەرداگرتنی شارەکانی باکووریان لە نزیک ماوەدا لەلایەن پەکەکەوە رادەگەیاند .
ئەمە یەکەمین جار نییە ئەم هەڵسەنگاندن و لێکدانەوە ساکارانە جێی بیرکردنەوەو پێشبینی زانستیانەی رووداوەکان بگرنەوە ، بەڵکو ئەم خۆشخەیاڵییە لەمێژووی سەدساڵی رابردوودا چەندپات بۆتەوەو ، سیاسەتمەداران و سەرکردایەتی حزبەکانی کوردایەتیش پشکی شێریان بەرکەوتووەو ، بیرکردنەوەو رای گشتییان چەواشەکردووە .
ئەم کودەتایە سەربکەوتایە یان سەرنەکەوێت ، ئۆردوگان بمێنێتەوە یان نەمێنێتەوە ، کاریگەرییەکی ریشەیی لەسەر باری سیاسی و ئابووری و کۆمەڵایەتیی تورکیا دروست نەدەکرد ، چونکە گەلانی تورکیا باری شانیان هەر بە شانی خۆیانەوە دەبێت و ، لەسایەی سیستمی سەرمایەدارییدا دەمێنننەوە ، جا بەشێوە ئیسلامییەکەی یان بەشێوە ناسیۆنالیستییەکەی بێت . خەڵکی کرێکارو زەحمەتکێشانی بیرو بازووی تورکیا بە خەڵکی چەوساوەی کوردیشەوە ، هێشتا هەر لەبەردەم ئەرکەکانی شۆڕشی دیموکراتی و شۆڕشی سۆسیالیستیدان و ، تەنیا ئەو شۆڕشەیە کۆتایی بەهەموو کوێرەوەرییەکانیان دەهێنێت .
ئەوەی لە دوێنێ شەوەوە لە تورکیا روودەدات ، ململانێی ئەو دوو باڵە بۆرژوازییەیە ، ناکۆکی نێوان خانەوادەی بۆرژوازییەتە لە تورکیا ، هیچ پەیوەندییەکی بە مافی مرۆڤ و دەستوورو بەرژەوەندی خەڵکییەوە نییە ، بۆ ئێمەی کورد _ وەک ناسیۆنالیستیی کوردی وێنای دەکات – سوودناگەیەنێت و مایەی خۆشحاڵی نییە . بەپێچەوانەوە دسەڵات لە تورکیادا ، بۆ هەر لایەنێکیان ساخبێتەوە ، سەرەتای بارێکی ناهەمواری پڕ لەتوندوتیژیی و ئیرهابی دەوڵەت دەبێت ، سەردەمێکی فاشستیانەی ئیسلامیی ئیخوانی یان میلیتاریستیی نەتەوەیی دێتە ئاراوە .
گەلی کورد لە باکووری کوردستان ، چارەیەکی نییە جگە لە بەردەوامیی تێکۆشان بەهەردوو شێوەکەیەوە : شێوەی مەدەنی ، بەو شێوەیەی بزووتنەوەی سیاسیی مەدەنیانە بۆ خۆیی دیاریدەکات ؛ شێوەی چەکداری و وەرچەرخانی بە جەنگی گەل بە هاوکاری و پاڵپشتیی هێزە کۆمۆنیست و چەپ و دیموکراتەکانی تورکیاو جیهان ، کە لە چەند دەیەی رابردوودا هەر ئەوان دۆستی راستەقینەی پەکەکەو ئاپۆو بزووتنەوەی رزگاریی نەتەوایەتی کورد بوون . ئەمە رێگایەکی مێژووییە دەکەوێتە دەرەوەی ئیرادەی دەوڵەتە زلهێزەکانی جیهان و ، مێژووش راستی و دروستیی دەسەلمێنێت .
nanwazadi 