جەوھەری مرۆڤ و مرۆڤبوون

جەوھەری مرۆڤ و مرۆڤبوون
فوئاد قەرەداغی
29 – 3 – 2018
جیھانبینی … مرۆڤبوون
هاوڕێ گیان : جیهانبینی من مرۆڤبوونە . ئەگەر ئەمە بزانیت ، لە نووسینەکانیشم تێدەگەیت .

مرۆڤبوون جیاوازی و کینە رەتدەکاتەوە
ھاوڕی گیان : مرۆڤبوون ، جیاوازیی و کینەی نێوان مرۆڤەکان بەپێی ( جێندەر ، نەتەوە ، زمان ، ئایین ، رەنگی پێست …ھتد ) رەتدەکاتەوە .

جەوھەری مرۆڤ لە گۆڕاندایە
مرۆڤ جەوھەرێکی نەگۆڕی ئەزەلی و ئەبەدی نییە ، رەھەندی مێژوویی وکۆمەڵایەتی ھەیە . بەپێی گۆڕانکاریی لەو رەھەندانەدا ماھییەتی دەگۆڕێت .

ماھییەتی مرۆڤ چییە ؟
ماھییەتی مرۆڤ ، تایبەتمەندیی تاکەکەسەکان نییە ، بەڵکو کۆی پەیوەندییە کۆمەڵایەتییەکان و ھەلومەرجی مێژوویی و کۆمەڵایەتییە .

ئامانجی خۆپیشاندانەکان ھەڵوەشاندنەوەی سیستمی پاشەکەوتکردنی مووچەیە

ئامانجی خۆپیشاندانەکان ھەڵوەشاندنەوەی سیستمی پاشەکەوتکردنی مووچەیە
فوئاد قەرەداغی
ئامانجی خۆپیشاندانەکان
ئامانجی خۆپیشاندانەکان ، ھەڵوەشاندنەوەی سیستمی پاشەکەوتکردنی مووچەیە ، نەک کێبەرکێی سیاسی و ئایدیۆلۆژیی حیزبی کەوت.
28 – 3 – 2018
ئیسلامی سیاسی و خۆپیشاندانەکان
ھەوڵێکی ئیسلامی سیاسی ھەیە بۆ بەلاڕێدابردن و لەباربردنی خۆپیشاندانەکان وەک چۆن خۆپیشاندانەکانی سەرای ئازادییان مایەپووچکرد .
28 – 3 – 2018

گواستنەوەی نوێژ بۆ سەر شەقام
گواستنەوەی نوێژ لە ماڵەکانی خوداوە بۆسەر شەقام ، پەیوەندیی بە ھەڵوەشاندنەوەی سیستمی پاشەکەوتکردنی مووچەوە نییە .
28 – 3 – 2018

پاساو بۆ سەرکوتی خۆپیشاندانەکان
پاساوی دەسەڵات بۆ سەرکوتکردنی خۆپیشاندانەکان ، سەرپێچیکردنی یاساکانی دژە تێرۆرو رۆژنامەگەری و وەرنەگرتنی مۆڵەتی خۆپیشاندانە .
28 – 3 – 2018

دەوڵەتداریی و سەرکوت و ناسنامەی شەق

دەوڵەتداریی و سەرکوت و ناسنامەی شەق

فوئاد قەرەداغی

دەزگاکانی دەوڵەتداریی
دەزگاکانی دەوڵەتداریی: حکومەت. پەڕلەمان . دادگا . سوپا . پۆلیس . ئاسایش . زیندان . یاساکانی رێکخستن و ھەماھەنگی ئەو دەزگایانە .
26 – 3 – 2018

ئامرازەکانی سەرکوتی خۆپیشاندان
ئامرازەکانی سەرکوتی خۆپیشاندان : کوتەک . کێبڵ . گازی فرمێسکڕێژ . فیشەکی پلاستیکی . دەمانچە ، کڵاشینکۆف . بۆکس . شەقوەشاندن . گرتن . راگەیاندنی حیزبی و حکومی . چەند یاسای جیاجیا بۆ پاساوی بەکارھێنانی ئەو ئامرازانە .
26 – 3 – 2018

شەق و ناسنامەی نەتەوەیی
شەق (شاپ) ناسنامەی نەتەوەیی نییە ، شەق هەر شەقە ، کوردی بێت یان عەرەبی یان تورکی وەکویەک بە ئازارو سوێن و شکۆی مروڤ دەشکێنن .
26 – 3 – 2018

ئەمڕۆ ئاسایش سووکایەتی بە مامۆستایان کرد

ئەمڕۆ ئاسایش سووکایەتی بە مامۆستایان کرد
فوئاد قەرەداغی
رەفتاری فاشستیانە
پەلاماردان و لێدانی خۆپیشاندەران رەفتارێکی فاشستیانەی ئاسایشی هەرێمە بەرامبەر داوا رەواکانی خەڵکی ستەمدیدەی کوردستان .

شەقوەشێنەکانی دەسەڵات
ئەمڕۆ شەقوەشێنەکانی دوا پەردەیان لەڕووی ئازادی و مافی مرۆڤ و دیموکراسیی ساختەی دەسەڵات هەڵماڵی .
سووکایەتی بە مامۆستایان
ئەمڕۆ ئاسایش سووکایەتی بە مامۆستایان کرد . دەبێت هەڵوێستی وەزیری پەروەردە چیی بێت ? ئایا دەست لە کار دەکێشێتەوە ؟
25 – 3 – 2018

ئەگەری پەلاماردانی بیانی و ئەرکی بەرەنگاربوونەوەی

ئەگەری پەلاماردانی بیانی و ئەرکی بەرەنگاربوونەوەی
فوئاد قەرەداغی

ھۆکارەکانی خیانەت
هۆکارەکانی خۆفرۆشتن و خیانەت لە گەل و نیشتمان ، بەرژەوەندییە مادییەکان و رکوکینەی خێڵەکیانەیە .
چاوساغیی بۆ لەشکری بیانی
هێزی سەربازیی بیانی بەبی چاوساغی و پێشلەشکریی هێزێکی خۆماڵی ناتوانێت لە باشووری کوردستاندا پێشڕەوی بکات .
بەرەنگاربوونەوەی پەلاماردانی بیانی
بەرەنگاربوونەوەی ھەر پەلاماردان و دەستدرێژییەکی بیانی بۆ سەر شارو شارۆچکەکانی باشووری کوردستان ، ئەرکی دەسەڵاتدارانی عێراق و هەرێم و ھێزە چەکدارەکانیانە .

نەورۆز . . . حوکمڕانیی ھەرێم

نەورۆز . . . حوکمڕانیی ھەرێم
فوئاد قەرەداغی
واتاکانی نەورۆز

1 – بەهارو سەری ساڵی نوێ .
2 – داستان و ئەفسانەی زوحاک و مارەکانی سەرشانی و خۆراکی رۆژانەیان کە مێشکی دوو گەنجە .
3 – ئاگرکردنەوەو ئاھەنگ و خۆڕازاندنەوەو سفرەی حەفت سین و ھەڵپەرکێ و گۆرانی …ھتد .
4 – نۆژەنکردنەوەی ساڵانەی خەباتی نەتەوەیی ( کوردایەتی ) .
5 – کێبەرکێی نێوان خێرو شەڕ و چاکەو خراپە .
6 – ململانێی نێوان ستەمکارو ستەملێکراوان ( دەسەڵات و خەڵک ) .
ھەر چینێک و ھەر تاکەکەسێکیش بەپێی ئینتیمای چینایەتی و ئایدیای خۆی پێڕەوی یەکێک یان زێتر لەو واتایانە دەکات .

جێگرەوەکانی حوکمڕانانی ھەرێم
نوێنەرانی قوتابخانەی کوردایەتی لە حوکمڕانیدا سەرکەوتوو نەبوون . ئەوانەشی دەیانەوێت جێگرەوەیان بن لەوان باشتر نین .
پەیامی حکومەتی هەرێم

بۆ تورکیا : لە بۆردومانی گوندەکان بەردەوامبە .
بۆ پەکەکە : بارکەن ، بڕۆن

حکومەت و قەیرانەکانی ژیان

حکومەت و قەیرانەکانی ژیان
فوئاد قەرەداغی

فەشەلی حکومەتی کوردی
27 ساڵ : فەشەلی یەک لەسەر یەکی حکومەتی کوردی ، فەشەلی 27 ساڵیدیش دەبینین ئەگەر ئەمانە ھاوشێوەکانیان لە حوکمڕانیی بەردەوام بن ، یان لە ئایندەدا حوکمڕانمان بن .

رۆحمان ھەلاھەلا بووە
بەدەست حکومەتی عەرشی کەلاوەو سیاسییە نەزانەکانەوە رۆحمان هەلاهەلا بووە ، بۆیە بەناچاریی لێرەدا بەشێکی خەمەکانمان بەبادەکەین .

تێگەیشتن لە سیاسەت
هەمووهەڵسن بەپێوە ، سەرۆکمان ها بەڕێوە : هێشتا زۆربەیەک بەم عەقڵییەتەوە لە سیاسەت دەگەن .

قەیرانی ژیان لە ھەرێمدا
سیاسەت و ئابووری و باری کۆمەڵایەتی ورۆشنبیری و تەندروستی و پەروەردەوفێربوونی هەرێم لە قەیراندان . جا چیمان لە قەیراندا نییە ؟

خوێندن

خوێندن
فوئاد قەرەداغی

خوێندنی خۆڕایی
خوێندنی خۆڕایی لە ھەموو قۆناخەکانی خوێندندا ، مافێکی دەستووریی ھەر ئەندامێکی کۆمەڵگایە .

خەرجیی خوێندن
ئەرکی حکومەتی ھەرێمە خەرجیی خوێندنی ھەموو قۆناخەکان لەئەستۆ بگرێت و ، کەشێکی یەکسان بۆ گشت خوێندکاران بسازێنێت .

خوێندنی سەرکەوتوو
دابینکردنی کەشێکی ئاسوودەو ئارام بۆ مامۆستایان و خوێندکاران ، خوێندنێکی سەرکەوتوو دەستەبەردەکات .

تراژیدیای عەفرین

تراژیدیای عەفرین
فوئاد قەرەداغی

پێشوازیی ئەردۆگان لە ئامەد
کۆکردنەوەی زۆرەملێی خەڵک بۆ پێشوازیی ئەردۆگان لە ئامەد راگەیاندنکاریی و جەنگی دەروونی بوو دژی کورد بە گشتی و رۆژئاوا بەتایبەتی .

جەنگی پارتیزانی و بەشداریی جەماوەر
جەنگی پارتیزانی جەنگی گەلە ، بەبێ بەشداریکردنی جەماوەرو بەرەی فراوانی خەڵک ، سەرکەوتن بەدەستناهێنێت .
راگەیاندنی ماتەمینی بۆ عەفرین
راگەیاندنی ماتەمینی بۆ عەفرین لە سلێمانی پەیوەندیی بە هەڵبژاردنەکانەوە هەبوو . هەڵوێستی حکومەتی ھەرێمیش بە رەتکردنەوەی ، پشتگیریی داگیرکردنی عەفرین بوو لەلایەن تورکیاوە .

عەفرین و کاردانەوەی حکومەتی ھەرێم
دوای داگیرکردن و کوشتارو وێرانکردنی عەفرین ، دەبێت کاردانەوەو هەڵوێستی عەمەلیی حکومەتی هەرێم بەرامبەر تورکیا چیی بێت ؟

ھەڵوێست لە عەفەرین و ھەڵەبجە
هەڵوێستی دەوڵەتە زلهێزەکانی جیهان و دەوڵەتە ئیسلامییەکان لە جینۆسایدی عەفرین وەک هەڵوێستیان لە کیمیابارانکردنی هەڵەبجە : پشتگیریییییی و بێدەنگییییییی بوو .

دەربارەی ئاسایشی نەتەوەیی

دەربارەی ئاسایشی نەتەوەیی
فوئاد قەرەداغی
ئاسایشی نەتەوەیی
ئاسایشی نەتەوەیی لەسایەی : بێدەوڵەتیی ، بێسەروەریی و وابەستەییدا ، واتای سەرکوتکردنی جەماوەری ناڕازیی لە دەسەڵات دەگەیەنێت .

دیسان ئاسایشی نەتەوەیی
بۆ ئاسایشی نەتەوەیی : سنوورمان نییە بیپارێزن ، دەوڵەتمان نییە بەتەنگ سەروەرییەوە بن ، تەنها خەڵکی ناڕازیمان هەیە سەرکوتیان بکەن .

پارێزەرانی ئاسایشی نەتەوەیی لە کوێن ؟
جەندرمەکانی تورکیا سەرباری بنکە سەربازییەکانیان لە هەرێمدا ، لە ناوچەی سیدەکانیش سنووری هەرێمیان بەزاندووە . پارێزەرانی ئاسایشی نەتەوەیی ئێوە لە کوێن ؟