پەروەردەو پیاوسالاریی

پەروەردەو پیاوسالاریی
فوئاد قەرەداغی

چاندنی پیاوسالاریی لە کەسایەتیی منداڵاندا
بنەمای پیاوسالاریی ، سیستمی چینایەتییە . پەروەردەی نێو خێزان و قوتابخانە ، لە کەسایەتیی منداڵان و هەرزەکاراندا دەیچێنن .

باوکسالاریی و ژنکوشتن بە پاساوی پاراستنی شەرەف
دیاردەی ژنکوشتن بە پاساوی پاراستنی شەرەف ، رەنگدانەوەی رەفتارو رەوشتی باوی کۆمەڵگەی باوکسالاریی خێڵەکییە سیستمی پەروەردە هەوێنێتی .

هۆکارێکی بنەڕەتیی کوشتنی ژنان
هۆکارێکی بنەڕەتیی پەنابردنە بەر کوشتن بەگشتی و کوشتنی ژنان بە تایبەتی ، پەروەردەی پیاوسالاریانەی نێوماڵ و قوتابخانەیە .

هەڵوێست لە ئۆجەلان

هەڵوێست لە ئۆجەلان
فوئاد قەرەداغی
فڕاندنی ئۆجەلان
بە هاوکاریی سی.ئای.ئەی ئەمریکاو مۆسادی ئیسرائیلی تورکیا توانی ئۆجەلان لە کینیاوە بفڕێنێ …

پارادۆکسی سیستمی سەرمایە
پارادۆکسێکی سیستمی سەرمایە : لە عێراق پۆستی سەرکۆمار بە کورد دەدرێت .. لە تورکیا رابەری نەتەوەیی کورد لە زیندان توند دەکرێت …!

ئاپۆ لە قەندیل پارێزراو دەبوو
دەڵێن : ئەگەر ئاپۆ لەبری وڵاتانی ئەوروپا رووی لە قەندیل بکردایە ، نەدەگیراو پارێزراو دەبوو .. تا چەند ئەمە راستە ؟!

ژنان و پەڕلەمان

ژنان و پەڕلەمان
فوئاد قەرەداغی

ژنێک سەرۆکی پەڕلەمانی کوردستانە
دانانی ژنێک بە سەرۆکی پەڕلەمان کارێکی ئەرێیانەیە ئەگەر بتوانێت رۆڵی هەبێت لە دانانی یاسایەکی مەدەنیدا بۆ باری کەسێتی .

ئەولەوییەتی کاری ژنانی نێو پەڕلەمان
ئەولەوییەتی کاری ژنانی نێو پەڕلەمان دانانی پڕۆژەیەکە بۆ هەڵوەشاندنەوەی فرەژنی و بڕیاردانی توندترین سزا بەسەر پیاوانی ژنکوژدا .

ژنان پاشکۆی پیاوانی دەسەڵاتدارن
هاوڕێم : راستە ، لە دامەزراوەکانی دەسەڵاتدا ، ژنان سەربەخۆ نین ، پاشکۆی پیاوان و ئامرازی جێبەجێکردنی سیاسەتی حزبە پیاوسالارەکانن .

خانمێکی تورکمان بوو بە جێگری سەرۆکی پەڕلەمان
ئەو خانمە تورکمانەی بەجێگری دووەمی سەرۆکی پەڕلەمان دانراوە کاندیدی گەلی تورکمانە لە باشووری کوردستان یان نوێنەری دەوڵەتی تورکیایە؟

سیاسەت لەنێوان هوشیاری و ساویلکەییدا

سیاسەت لەنێوان هوشیاری و ساویلکەییدا
فوئاد قەرەداغی

ساویلکەیی و گەمژەیەتیی لە سیاسەتدا
خۆشباوەریی بە ئاخاوتن و وشەی لووس و بریقەداری سیاسەتمەداری خاوەن بەرژەوەندیی تایبەت ، نیشانەی ساویلکەیی و گەمژەیەتییە لە سیاسەتدا .

چۆن لە سیاسەت تێدەگەین ؟
بۆ ئەوەی لەسیاسەت تێبگەین دەبێت بەرژەوەندییە چینایەتییەکانی ئەودیو بەڵێنی حیزبەکان و سەرکردەکانیان بخوێنینەوە .

پارتی بە تەزویر تۆمەتبارکرا
پارتییان بە تەزویرکردنی هەڵبژاردن تۆمەتبارکرد . ئەگەر پارتی بە تەزویرچی دەزانن ، بەپێی چ پرنسیپێک بەشداریی لە حکومەتەکەیدا دەکەن؟

باوکی حزب لە وڵاتانی دواکەوتوودا
حزبەکانی وڵاتانی دواکەوتوو کەسایەتییەک دەبێتە باوکیان وئاڕاستەیان دەکات ، کە ئەو نەما لەهەموو روویەکەوە وێران دەبن .

خەونی گەشەکردن و گۆڕانکاریی

خەونی گەشەکردن و گۆڕانکاریی
فوئاد قەرەداغی

خەونی گەشەکردنی هەرێم
خەونی گەشەکردنێکی بێوێنەی هەرێمی کوردستان لە چوار ساڵی داهاتوودا ، چیرۆکی ” بوونە خەلیفە بە خەیاڵ ” م بیردەخاتەوە !

دۆنکیشۆتانە گۆڕانکاریی ناکرێت
گۆڕانکاریی سیاسی-ئابووری- کۆمەڵایەتی و رۆشنبیریی دۆنکیشۆتانە ناکرێت ، بە بەرنامەڕێژی و سۆراخی رۆژانەو کاری جیددی بێپسانەوە دەکرێت .

هەڵگرتنی بەردی گەورە نیشانەی نەهاویشتنێتی
“هەڵگرتنی بەردی گەورە نیشانەی نەهاویشتنێتی” هەروەها هەڵگرتنی دروشم و بەرنامەی گۆڕانکاریی ئابووری وکومەڵایەتیی قۆناغێکی باڵاتر لەو قۆناغەی ئێستا .

ئەولەوییەت گۆڕانکارییە نەک شرۆڤەکردن
لە نێوان شرۆڤەکردنی جیهان و گۆڕینیدا ، ئەولەوییەت بۆ گۆڕانکارییە ، لەبەرئەوە گرنگیی بە گۆڕانکاریی بدەن نەک شرۆڤەکردن .

مرۆڤ و ئایین

مرۆڤ و ئایین
فوئاد قەرەداغی

پێڕەوکردنی ئایین قەناعەتی شەخسییە
زێتر لە٤۲۰۰ ئایین لەم سەر زەمینەدا هەیە ،کەواتە پێڕەوکردنی هەر ئایینێک قەناعەتێکی شەخسییە نەک بەرەنجامی لێکۆڵینەوەیەکی ورد لەسەر ئایینەکان .

ئایین رەهەندێکی جوگرافی هەیە
مرۆڤەکان ، لەو شوێنەی تێیدا دێنە ژیانەوەو گەورە دەبن ، ئایین بە میرات وەردەگرن . بەم پێیە ئایین رەهەندێکی جوگرافی هەیە .

ئازادی بۆ ئۆجه‌لان سه‌رکه‌وتن بۆ خه‌باتی رزگاریخوازانه‌ی گه‌لی کورد

ئازادی بۆ ئۆجه‌لان
سه‌رکه‌وتن بۆ خه‌باتی رزگاریخوازانه‌ی گه‌لی کورد
فوئاد قەرەداغی
روونکردنەوەیەک
ئەمڕۆ ١٥ – ٢ – ٢٠١٩ بیست ساڵ بەسەر دەستگیرکردن و زیندانیکردنی ( عەبدوڵڵا ئۆجەلان ) رابەری بزووتنەوەی رزگاریخوازیی نەتەوەیی کورد لە باکووری کوردستان تێدەپەڕێت . ئۆجەلان لە ئەنجامی هەڕەشەی تورکیا بە بەرپاکردنی جەنگ دژی سوریا ، ناچارکرا سوریا بەجێبهێڵێت و روو لە روسیا بکات ، بەڵام دەسەڵاتدارانی ئەو کاتەی روسیا داڵدەیان نەدا و رووی لە ئیتالیاو دواتر کینیا کرد ؛ لەوێ بەپێی پلانگێڕییەکی نێودەوڵەتی کە هەرسێ دەزگای هەواڵگریی جاسوسی ( سی.ئای.ئەی ، میتی تورکیا ، مۆسادی ئیسرائیل ) ی تێدا هاوئاهەنگ بوون ئۆجەلان دەستگیرکراو بۆ تورکیا برایەوە .
ئەو کاتە ، واتە بەر لە بیست ساڵ ، کاتێک هێشتا لە ئیتالیا دەستبەسەربوو ، نەگیرابوو ، بەناوی دەستەی نووسەرانی گۆڤاری ( دواڕۆژ ) ەوە وتارێکم نووسی ، ئەمڕۆ لەم بۆنەیەدا بڵاویدەکەمەوە ، لەگەڵ هیوای ئازادبوونی ( ئاپۆ ) و سەرکەوتنی خەباتی نەپساوەی گەلی کورد لە باکوور و بەدەستهێنانی تەواوی مافە نەتەوەیی و مرۆییەکانیان . ( فوئاد قەرەداغی ) ١٥ -٢ – ٢٠١٩
*************************************
یه‌کێک له‌ ئاکامه‌کانی جه‌نگی ئیمپریالیستیی جیهانی و په‌یمانه‌ به‌دناوه‌که‌ی ( لۆزان ) ، دابه‌شکردنی کوردستان و پێشێلکردنی مافی بڕیاردانی چاره‌نووس بۆ گه‌لی کورد بوو . به‌شێکی گه‌وره‌ی کوردستان به‌ر تورکیا که‌وت . سیاسه‌تی تواندنه‌وه‌ی نه‌ته‌وایه‌تی و جینۆسایدو نکوولیکردن له‌ ناسنامه‌ی نه‌ته‌وایه‌تیی چه‌ندین ملیۆن کورد ، له‌ دڕنده‌ترین شێوه‌ی چه‌وساندنه‌وه‌ی نه‌ته‌وایه‌تیدا ، بۆ زیاتر له‌ حه‌فتا ساڵ ، توانی ده‌نگی به‌رهه‌ڵستکاریی رێکخراوه‌یی خه‌ڵکی سته‌مدیده‌ی کورد کپ بکات . به‌ڵام هه‌میشه‌ چه‌وساندنه‌وه‌ کاردانه‌وه‌که‌ی به‌رهه‌ڵستییه‌ . له‌هه‌رجێیه‌ک چه‌وساندنه‌وه‌ هه‌بێت به‌رهه‌ڵستیکردنی – زوو یان دره‌نگ – وه‌ک یاسایه‌ک لێده‌ڕسکێت و به‌ڕووی چه‌وسێنه‌راندا راده‌په‌ڕێت . ئه‌مه‌ ئه‌و راستییه‌یه‌ که‌ بزووتنه‌وه‌ی رزگاریخوازانه‌ی گه‌لی کورد له‌ باکووری کوردستاندا جه‌ختیکرده‌وه‌و ، به‌ رابه‌ری پارتی کرێکارانی کوردستان ( پەکەکە ) سەردەمێکی نوێی بەرهەڵستکردنی خولقاندەوە .
په‌که‌که‌ له‌ سه‌ره‌تاوه‌ ، به‌دیدگایه‌کی تیۆریی شۆڕشگێڕانه‌و ستراتیژێکی روونه‌وه‌ بۆ کێشه‌ی کورد ، له‌ سه‌نگه‌رێکی پێشه‌وه‌ی خه‌باتی دژه‌ ئیمپریالیستیدا جێی خۆی کرده‌وه‌و ئیمپریالیزم و حوکمی بۆرژوا ناسیۆنالیستی تورکیای هێنایه‌ له‌رزین .
رژێمی بۆرژوا شۆڤێنیزمی تورکیا ده‌ ساڵ زیاتره‌ هه‌رچییه‌کی له‌ده‌ستهاتووه‌ بۆ له‌ناوبردنی به‌رهه‌ڵستیکردنی شۆڕشگێڕانه‌ی گه‌لی کوردو له‌ناوبردنی ( په‌که‌که‌ ) کردوویه‌تی . دوای راپه‌ڕینه‌ مه‌زنه‌که‌ی باشووری کوردستان و پێکهێنانی حکومه‌تی هه‌رێمی کوردستانیش ، جگه‌ له‌ هێرشه‌ سه‌ربازییه‌کانی بۆ سه‌ر ناوچه‌کانی ژێر ده‌سه‌ڵاتی حکومه‌تی هه‌رێم ، له‌ کایه‌ی سیاسه‌تی ئیقلیمی و نێوده‌وڵه‌تیدا ، بۆ گه‌مارۆدانی ئه‌زموونی باشووری کوردستان و له‌ناوبردنی گه‌ریلاکانی باکوورو پاکتاوکردنی ته‌واوی کێشه‌ی کورد ، درێغی نه‌کردووه‌ . پڕۆژه‌ی ( گاپ ) و کۆبوونه‌وه‌ سێ قۆڵییه‌کان و رێککه‌وتنی سه‌ربازی له‌گه‌ڵ ئیسرائیلداو … هتد ، ئه‌ڵقه‌ ئه‌ڵقه‌ی پیلانێکی ئیمپریالیستی و شۆڤێنیستییه بۆ خنکاندنی کێشه‌ی کوردو ئابڵووقه‌دانی له‌ هه‌موو لایه‌که‌وه‌ . به‌ڵام جه‌نگی ناڕه‌وای تورکیا دژی بزووتنه‌وه‌ی رزگاریخوازانه‌ی گه‌لی کوردو ، جموجۆڵه‌ دیپلۆماسییه‌کانی – وه‌ک ته‌واوکه‌ری جه‌نگ –له‌به‌رده‌می ئیراده‌ی شۆڕشگێڕانه‌ی به‌رهه‌ڵستیکارانی ( پەکەکە ) و جەماوەری خەڵکی سته‌مدیده‌ی کوردستاندا هه‌ره‌سی هێناو له‌ئاکامی دواپیلانیدا ته‌پڵی نابووتی و ریسوایی بۆ لێدرا .
پیلانی ئه‌مجاره‌یان له‌ فشارخستنه‌سه‌ر سوریاوه‌ ده‌ستیپێکرد . له‌ بارودۆخێکی ئاڵۆزدا ، له‌ ئاکامی فه‌شه‌لی سیاسه‌ته‌کانی نێوخۆدا ، ته‌ونی چۆکدادان به‌ سوریا له‌ به‌رامبه‌ر ئیسرائیلداو ئاشبه‌تاڵکردن به‌ ئۆجه‌لان و په‌که‌که‌یان چنی . به‌ هه‌ڕه‌شه‌ی سه‌ربازی و ئاماده‌کردنی زه‌مینه‌ی جه‌نگێکی دیکه‌ له‌ ناوچه‌که‌دا ( دوای جه‌نگی که‌نداو ) ، یه‌که‌م هه‌نگاو عه‌بدوڵڵا ئۆجه‌لانی سه‌رۆکی پارتی کرێکارانی کوردستانیان ناچارکرد سوریا به‌جێبهێڵێ و به‌ره‌و روسیا به‌ڕێبکه‌وێ . خه‌ڵکیش چاوه‌ڕوانی ئه‌وه‌بوون ئۆجه‌لان له‌ روسیای ( لێنین ) دا داڵده‌ بدرێت ، به‌ڵام ” دیموکراتییه‌ت ” ی ( یه‌ڵتسن) ی ، ئیراده‌ی دۆمای پێشێلکردو ئۆجه‌لانی له‌خۆنه‌گرت . ئێستا سه‌رۆکی ( پەکەکە ) لە ئیتالیا ده‌ستبه‌سه‌ره .
هه‌واڵی بوونی ئه‌و له‌ ئیتالیاو فشاری به‌په‌له‌ی تورکیا له‌سه‌ر ئیتالیا بۆ دانه‌وه‌ی و دادگاییکردنی وه‌ک ” تێرۆریست” ێک ، له‌ ناخه‌وه‌ ویژدانی ئازادیخوازانی کوردو جیهانی هه‌ژاند ، بۆیه‌ هه‌ڵمه‌تی خه‌باتێکی سیاسی و دیپلۆماسیی ئه‌وروپایی و جیهانی ، چالاکییه‌کی که‌موێنه‌ی له‌ مێژووی خه‌باتی بزووتنه‌وه‌ی رزگاریخوازانه‌ی گه‌لی کورددا ورووژاندو وه‌رچه‌رخاندنێکی گه‌وره‌ی له‌ خستنه‌ڕووی کێشه‌ی مافه‌ مرۆیی و سیاسییه‌کانی گه‌لی کورد تۆمارکرد .
ئیمڕۆ ده‌ستبه‌سه‌ریی ئۆجه‌لان بۆته‌ هێمای کێشه‌ی نه‌ته‌وه‌یه‌کی چه‌وساوه‌ له‌م جیهانه‌دا که‌ له‌ دوا ساڵی سه‌ده‌ی بیسته‌م و پێنانه‌ سه‌ده‌ی بیست و یه‌که‌مدا هێشتا قه‌واره‌یه‌کی سیاسی نییه‌و له‌م جیهانه‌ لنگه‌وقووچه‌ی بازاڕی ئازادو بانگاشه‌ی مافه‌کانی مرۆڤ و سیستمی نوێی جیهانیدا له‌ ناوه‌وه‌ جینۆساید ده‌کرێت و له‌ ده‌ره‌وه‌ی کوردستانیشدا قه‌ره‌جئاسا ده‌ژی .
له‌ به‌رامبه‌ر بارودۆخێکی ئاوه‌هادا ، ئه‌وه‌ به‌ ئه‌رکی سه‌رشانی خۆمان و تێکۆشه‌رانی باڵه‌ جیاجیاکانی بزووتنه‌وه‌ی رزگاریخوازانه‌ی گه‌لی کوردو خه‌باتکارانی بزووتنه‌وه‌ی سۆسیالیستیی کرێکاران ده‌زانین ، به‌جیا له‌وه‌ی له‌ڕووی ئایدیۆلۆژی و سیاسییه‌وه‌ دوورن یان نزیک له‌ ئایدیۆلۆژی و سیاسه‌تی ( په‌که‌که‌ ) وه‌ ، هه‌روه‌ها به‌ده‌ر له‌وه‌ی ئه‌م مه‌سه‌له‌یه‌ له‌ ناکۆکی نێوان رژێمه‌ سه‌رمایه‌دارییه‌کانی ئه‌وروپاو رژێمی سه‌رمایه‌داریی ئه‌مریکاو ململانێی جه‌مسه‌ربه‌ندییه‌ ئابوورییه‌کانی جیهاندا چ رۆڵێک ده‌بینێت و چۆن ده‌قۆزرێته‌وه‌ ، به‌ گیانی هه‌ستکردن به‌ بایه‌خی ئه‌م قۆناغه‌و بۆ هه‌رچی زیاتر چوونه‌پێشه‌وه‌ی کێشه‌ی گه‌لی کورد له‌ ئاستێکی جیهانیداو دانپێدانانی مافی بڕیاردانی چاره‌نووسی خۆی ، پشتگیریی ته‌واوی سه‌رۆکی پارتی کرێکارانی کوردستان بکه‌ن .
ئێمه‌ وه‌ک ده‌سته‌ی نووسه‌رانی( دواڕۆژ ) پێمانوایه‌ که‌ مافی په‌نابه‌ریی سیاسی ، مافێکی بێ ئه‌ملاو ئه‌ولای هه‌ر تێکۆشه‌رێکی سیاسییه‌ که‌ یاساکانی وڵاتی خۆی ئازادی لێ زه‌وت بکات . بۆیه‌ داواکارییه‌کانی ئۆجه‌لان به‌ڕه‌وا ده‌زانین و پشتگیری لێده‌که‌ین .
ئێمه‌ ده‌نگمان ده‌خه‌ینه‌ پاڵ هه‌موو ئه‌و ده‌نگانه‌ی بۆ دادگاییکردنی رژێمی تورکیا له‌به‌رده‌م دادگایه‌کی نێو‌ده‌وڵه‌تیدا به‌رزده‌بنه‌وه‌ به‌ تۆمه‌تی جینۆسایدو تێرۆری ده‌وڵه‌تیی دژی گه‌لی کوردو ، ته‌واوی ئه‌و تۆمه‌تانه‌ی ده‌درێنه‌ پاڵ ( پەکەکە ) و ئۆجەلان بە ناڕەواو نالۆژیکی و پووچەڵی ده‌بینین و ئازادی بۆ ئۆجه‌لان و هیوای سه‌رکه‌وتن بۆ خه‌باتی رزگاریخوازانه‌ی گه‌لی کورد له‌ هه‌موو به‌شه‌کانی کوردستاندا ده‌خوازین .
فوئاد قه‌ره‌داغی
گۆڤاری ( دواڕۆژ ) ژماره‌ ( 6 ) کانونی یه‌که‌م 1998

هیچ هاوڕێیەکی فەیسبوک بلۆک ناکەم

هیچ هاوڕێیەکی فەیسبوک بلۆک ناکەم
فوئاد قەرەداغی
21 – 2 -2019
هاوڕێم کاک فوئاد حەسەن سەرسپی بە کۆمێنتێک رای خۆی لەسەر کۆمێنتێکی پێشووم دەربریوە . لەگەڵ رێزو سوپاسمدا بە کۆمێنتێک وەڵامم داوەتەوە بە پێویستمزانی هاوڕێیانم لە فەیسبوک هەموو کۆمێنتەکان ببینن .

روونکردنەوە : من هیچ هاوڕێیەکی فەیسبوک بلۆک ناکەم بەوانەشەوەکە قوربانیی نەزانین ولەئاستێکی نزمدا دژی بیروبۆچوونەکانم دەنووسن ( فوئاد قەرەداغی )

بۆ مامۆستای گەورەو بەڕێز فؤاد قەرەداخی
من دژی بلۆک کردنم بەڵام کوردی بەعسی
ناگرێتەوە وە زۆر باوەڕم بەئازادی بیرو باوەڕ هەیە . ( فوئاد حەسەن سەرسپی )

برای بەڕێزم کاک فوئاد … سڵاو سوپاست دەکەم بۆ تێبینییەکەت لەڕاستیدا لەوەرگرتنی هاوڕێدا هەوڵمداوە کۆنە بەعسییەکان وەرنەگرم ئاخر نابێت ئەوانە هاوڕێمان بن . من قسەم لە هاوڕێکانم کردووە کە بلۆکیان ناکەم دڵنیام ئەگەر تاک و تەرایەک کوردی بەعسی پێمنەزانیبێت و بووبێتە هاوڕێم لە فەیسبوک ئەوە ئەو جۆرەن کە ئەو زرووفە ناچارکراون ببنە بەعسی و پیاوخراپییان نەکردووە . ئێمەومانان ئەگەر بتوانین لەڕێی نووسینەکانمانەوە کارێکی ئیجابی لەو نەوعە بەعسیانە بکەین کە زیانیان بۆ خەڵک نەبووە کارێکی باشە من لەو رایەدام دەبێت دەرکامان کراوە بێت تا ئەوانە هەست بە هەڵەکانی رابردوویان بکەن و ببنە هاوڵاتییەکی باش ، هەڵبەت ئەم هەڵوێستە جیاوازە لە هەڵوێستی بەرەی کوردستانی کە لێبوردنی بۆ هەموو بەعسییەکان و جاشەکان دەرکردو جاشەکانی ناونا چەکدارە شۆڕشگێڕەکان‌ لەوەش خراپتر وەرگرتنیان بوو لە ریزی حیزبەکانداو وەرگرتنی پۆستی گەورەبوو لە پەڕلەمان و ئەنجومەنی‌ وەزیرانی حکومەتی هەرێمدا . ( فوئاد قەرەداغی )

خۆشەویستیی و بەرژەوەندیی

خۆشەویستیی و بەرژەوەندیی
فوئاد قەرەداغی
10 – 2 – 2019

یەکەم …
خۆشەویستیی چەمکێکە هەموو ئاینەکان و فەلسەفەکان وئایدیاکان ، لەسەرەتای بوونی مرۆڤەوە تا ئەمڕۆ لێی دواون ، بەرەهایی پێناسە ناکرێت ؟

دووەم …
خۆشەویستیی بەهەموو جۆرەکانیەوە هۆکارو بنەمای تایبەتی و ئامانجی دیاریکراوی هەیە ، تەنها بە نیازچاکیی نابەخشرێت .

سێیەم …
خۆشەویستی و رکوکینە دوولایەنی ناکۆکییەکن لە پەیوەندیی عاطیفی نێوان مرۆڤەکاندا ، دەشێت بەپێی بەرژەوەندییە جیاوازەکان جێگۆڕکێ بکەن .

چوارەم…
بنەماکانی سۆزی خۆشەویستییە جیاجیاکان ، بەرژەوندییە شەخسی و کۆمەڵایەتییە جیاجیاکانن ، بەم واتایە خۆشەویستیی چەمکێکی چینایەتییە .

پێنجەم …
بەپێی چەمکی بەرژەوەندیی ، پەیوەندیی خۆشەویستی نێوان ئەندامانی خێزانیش بەدەرنییە لە بەرژەوەندییە ماددی و مەعنەوییەکانی نێو کۆمەڵگا .

شەشەم …
خۆشەویستییە جیاجیاکانی نێو کۆمەڵ کاریگەرێتیی ئاین و یاساو دابونەریت و بەرژەوەندیی ئابووری و فەلسەفەی کۆمەڵایەتییان بەسەرەوەیە .

حەوتەم …
بەخشینی خۆشەویستیی رەها لەم کۆمەڵگا چینایەتییەدا بیرکردنەوەیەکی ساکارو خۆشخەیاڵی و خەونێکی ئایدیالیستانەیەو ناتوانرێت بەدیبهێنرێت .

هەشتەم …
ئاساییترین و راستگۆترین و سروشتیترین پەیوەندیی خوشەویستیی ، پەیوەندی نێوان ژن و پیاوێکە بەدەرو جیا لە هەر بەرژەوەندییەک .

نۆیەم …
بەخشینی خۆشەویستیی بەهەموو بوونەوەرێک و بەهەرچی لەم گەردوونەدا هەیە ، بیرۆکەیەکی سۆفیگەرایانەیە و لە ئاستی خەیاڵدا دەمێنێتەوە .

دەیەم …
بەهای خۆشەویستیی بۆ ئیمانداران ، بەرژەوەندیی بەدەستهێنانی رەزامەندیی خوداو شادبوونە بەو بەهەشتەی بەڵێنی پێداون .
یازدەیەم …
خۆشەویستیی سۆفیانە بۆ خودا ، بەرژەوەندیی توانەوەی تێدایە لەنێو زاتی خودادا ” فەنا فیللا ” و بۆ بەهرەمەندبوونە لەنووری ئەبەدیی خودا .

دوازدەیەم …
بەرژەوەندیی تایبەتی و چینایەتی سەرچاوەی خۆشەویستی و پشتگیرییە بۆ هەر باوەڕێک-حزبێک-سەرکردەیەک و ، بەرنامەیەکی پراکتیکیی کارکردن .

خۆشباوەڕیی و نەبەکامیی سیاسی

خۆشباوەڕیی و نەبەکامیی سیاسی
فوئاد قەرەداغی
شوبات ٢٠١٩

ڤیدیۆیەک خۆشباوەڕیی دەخاتەوە
بۆ یەکەمجارە روداوێکی وەها روبدات لەسەرانسەری جیهان؟! دڵخۆشکەرە : ڤیدیۆیەکە ئەمڕۆ پەیتاپەیتا بۆم دەنێرن . ئەمە چ خۆشباوەڕییەکە !!!

ساویلکەو خۆشخەیاڵین
بەڕاستی تا رادەی ساویلکەیی خۆشباوەڕین ، ئەگەر نا ، بە پڕۆژەی سیناتۆرێکی ئەمریکایی خۆشخەیاڵ و دڵخۆش نابین !!!

تێگەیشتنی عەوامانە لە سیاسەت
دیاریکردنی ناکۆکیی سەرەکیی ‌بە حیزبێک ، بێشیکردنەوەی سەرجەم ناکۆکییەکانی وڵات ، نیشانەی نەبەکامی و تێگەیشتنی عەوامانەیە لە سیاسەت .

دەشێت دوو لایەنی نەیار پێکەوە هەڵبکەن
پەیوەندی سیاسی پابەندی پەیوەندی چینایەتییە بۆیە دەشێت دوو لایەنی نەیار لە کات و شوێن و مەرجێکی دیاریکراودا پێکەوە هەڵبکەن .

دەمارگیریی و دایەلۆگ و جنێودان
کەسانێک دەمارگیریی ئاینی و نەتەوەیی و حیزبییان هەبێت لە دایەلۆگدا پشوویان درێژ نییە کە وەڵامی لۆژیکییان پێنەما بە جنێو داتدەگرنەوە .

ئاڕاستەکردنی رکوکینە دژی یەک لایەنی سیاسی
هەوێیەکی هەیە ناوی کاڵێ-یە ، ئەمە حاڵی کەسانێکە لەنێو ئەو هەموو دوژمنەی گەلەکەماندا ،تەنها رکوکینە ئاڕاستەی لایەنێکی سیاسی دەکەن .