دەستووری سێکولار … پرسی سەرۆکایەتی … سازان

دەستووی سێکولار . . . پرسی سەرۆکایەتی . . . سازان

جەند هاوڕێیەکم لە فەیسبوک گلەیی لە بێدەنگیم دەکەن سەبارەت بە پرسە هەنووکەییەکانی سیاسەتی کوردی و ، داوای بیروڕام دەکەن لەسەر ئەو سێ پرسەی سەرەوە .
سەرەتا دەمەوێت بەو بەڕێزانە رابگەیەنم کە بێدەنگ نەبووم و ، چەند جارێک راستەوخۆو ناڕاستەوخۆ چ بە نوسین و چ لەڕێی کۆمێنتەکانمەوە لەسەر ئەو پرسانە بیروڕای خۆم دەربڕیوە. لێرەشدا زۆر بە کورتی و پوختی بیروبۆچوونم دەنووسم .
١ ) دەستووری ئێستای هەرێمی کوردستان بە گشتی دەستوورێکی کۆنەپەرستانەیەو ، نەک هەموارکردنەوە ، بەڵکو پێویستە سەرلەنوێ دابڕێژرێتەوە و گۆڕٌانکاریی ریشەیی تێدا بکرێت .
٢ ) ئەو لیژنەیەی بۆ هەموارکردنەوەی دانراوە ، تەنها دەستوورێکی ئیسلامیی بەرهەمدەهێنن .
٣ ) چاوەڕوانیی دەستوورێکی سێکولار لەم سیستم و دەسەڵاتەی ئێستا ئەگەر خۆخەڵەتاندن نەبێت ، ئەوا ساویلکەیی و تێنەگەیشتنە لە شوناسی چینایەتیی دەسەڵات .
٤ ) بەبێ دەستوورێکی سێکۆلار ، ئیددیعاکردنی دیموکراسی و ئازادی و یەکسانی و مافەکانی مرۆڤ و مافی منداڵان و ئازادی و یەکسانی بۆ ژنان ، چەواشەکاری و درۆی شاخداری بۆرژوا ناسیۆنالیست و ئایینی کورد دەبێت .
٥ ) پرسی سەرۆکایەتی خراوەتە ریزی پێشەوەی پرسەکانیدیکەو ، ئەو ژاوەژاوەی لەسەر ئەم پرسەیە ، بەمەبەستی شاردنەوەو بەژێر خۆڵەوەکردنی گەلێک پرسی دیکەیە کە پەیوەندی بە سیاسەتە فاشیلەکانی حکومەتی هەرێم و ئەو تەنگژانەوە هەیە کە بەرەوڕووی حکومەتی هەرێم و ژیان و گوزەرانی خەکی ستەمدیدەی باشووری کوردستان بوونەتەوە .
٦ ) پرسی سەرۆکایەتیی ، یەک ئەنجامی هەیە ، ئەویش مانەوەی دەسەڵاتی سەرۆکی هەرێم و پارتی دیموکراتی کوردستانە ، جا ئەوە بە درێژکردنەوەی ماوەی سەرۆکایەتی مەسعود بارزانی بێت بۆ دوو ساڵیدیکە ، یان هەڵوەشاندنەوەی پەڕلەمان و حکومەت و ، هەڵبژاردنی پێشوەختی پەڕلەمان بێت .
٧ ) هەموو لایەنەکان دەبێت تەسلیم بە ئەمری واقیع بن و ، ئیرادەی سیاسیی پارتی قبووڵ بکەن ، ئیتر هەر رێککەوتنێک دەکەن و چۆن ڕتووشی دەکەن لە سەرەنجامەکە ناگۆڕێت .
٨ ) سازان یان سازانی نیشتمانی لەلای من ئەم واتایانەی هەیە :
أ – سەرکەوتنی ئیرادەی پارتی لە درێژکردنەوەی ماوەی سەرۆکایەتی سەرۆکی هەرێم ، لانیکەم بۆ دوو ساڵی ئایندە .
ب – پووچەڵکردنەوەی چەمکی دیموکراسیی دەسەڵات لەلایەن خودی دەسەڵاتدارانەوە .
ج – سڕینەوەی رۆڵی پەڕلەمان و ، زاڵکردنی سەروەریی رۆڵی مەکتەبی سیاسیی حزبەکان لە بڕیارە چارەنووسسازەکاندا .
د – تێپەڕاندنی دەستوورێکی ئیسلامی لەسەرەنجامی ئەو سازانە نیشتمانییەدا .
ها – پێشێلکردنی پرنسیپەکانی سیستمی پەرڵەمانی .
و – بێ ئیرادەکردنی خەڵکی کوردستان لە بەشداریکردنی بڕیاری سیاسیدا .

فوئاد قەرەداغی
٦ / ٧ / ٢٠١٥